НАТО и сојузниците се подготвени да и пружат на Северна Македонија техничка поддршка и посилна соработка во однос на справувањето со различните видови на хибридни закани со кои се соочува земјата вклучително и борбата против дезинформациите. Ова го истакна генералниот секретар на Алијансата Јенс Столтенберг на вчерашната прес-конференција пред состанокот на НАТО Министрите за надворешни работи, одговарајќи на новинарско прашање поставено во однос на нападите врз виталните институции на Северна Македонија и лажните дојави за бомби.

„Неодамна, всушност, разговарав за ова прашање и со премиерот на Северна Македонија и, се разбира, НАТО е таму за да им помогне и да ги поддржи сојузниците бидејќи сега обезбедуваме помош и поддршка за Северна Македонија која се соочува со различни видови хибридни и киберзакани. Поддршката што НАТО и сојузниците се подготвени да ѝ ја пружат на Северна Македонија вклучува техничка поддршка и посилна соработка за борба против дезинформациите“, кажа Столтенберг.

Генералниот секретар на НАТО истакна дека НАТО и сојузниците се подготвени да дадат техничка поддршка на земјава, како и засилена соработка за борбата со дезинформациите.

„Сакам да ја пофалам Владата на Северна Македонија за брзата и детална работа во развивањето на програмата за соработка што ја договоривме“ рече Столтенберг.