Вереницата на Мик Џегер, Мелани Хамрик, откри дека била физички нападната во еден приватен клуб во Лондон, кога две лица ја зграбиле одзади. Таа на својот Инстаграм сподели детали за шокантниот инцидент, кој, како што пишува „Сан“, се случил во приватен клуб.

„Многу ми е тешко да го споделам ова, но вечерва бев физички нападната. Бескрајно сум им благодарна на моите пријатели што ме заштитија. Две лица ме зграпчија одзади и фала му на Бога што имаше добри луѓе кои веднаш притрчаа да помогнат“, напиша таа.

Мелани вели дека сè уште е потресена од настанот.

„Во шок сум, тажна и со скршено срце што луѓето можат да се однесуваат вака едни кон други“, порача таа.

Мелани и Мик Џегер имаат син и се во врска од 2014 година. Поранешната балерина го запознала славниот рокер на концерт на „Ролинг Стоунс“ во Токио истата година.