Најмалку 16 лица починаа во топлотниот бран што ја погоди Италија, соопштите властите во земјата.

Од почетокот на неделата, шест лица починаа додека престојувале во одморалишта или работеле на сонце.

Најмалку уште 10 постари лица починаа во болниците низ целата земја, кои беа примени во одделите за итни случаи со тешки симптоми на дехидратација.

Во Рим, пак, продолжуваат континуираните прекини на електричната енергија поради прекумерно оптоварување на електричната мрежа. Серија пожари избувнаа и во поширокото подрачје на италијанската престолнина.

Денес, во 18 градови тревогата е подигната на највисоко ниво, додека се очекува температурата во Јужна Италија да надмине 40 степени. Од недела, според експертите, се очекува живата значително да падне.

Конечно, поради екстремната жештина, автопатот што ги поврзува Милано и Венеција беше затворен неколку часа. На многу места, асфалтот се стопи и екипите мораа веднаш да бидат мобилизирани за да ја обноват површината на патот.