Пакистанската војска вчера изврши воздушни напади врз Авганистан, а во бомбардирањата загинаа најмалку 13 луѓе, меѓу кои 11 деца, пренесува „Дојче веле“.

„Пакистанската војска повторно го наруши воздушниот простор на Авганистан и бомбардираше цивилни домови во провинциите Кунар, Хост и Пактика. Како резултат на овие напади, загинаа 11 деца, една жена и еден постар маж, додека 14 други жени и деца се повредени“, изјави главниот портпарол на талибанците, Забихула Муџахид, на платформата Икс.

Пакистан засега нема објавено официјална изјава.

Двете земји се вклучени во конфликт кој досега оваа година однел стотици животи.

Нападите доаѓаат по сомнителен напад на милитанти од пакистанските талибанци врз безбедносен пункт во областа Хасан Хел во северозападната пакистанска покраина Хајбер Пахтунхва, која граничи со Авганистан.

Министерството за внатрешни работи на Пакистан вчера соопшти дека дошло до вооружена пресметка откако осомничените милитанти се обиделе да го заземат безбедносниот пункт, при што загинале шест припадници на пакистанската паравоена единица „Фронтир Констабјулари“.

Стотици загинати и ранети во воздушен напад на болница во Кабул – драматично ескалира конфликтот меѓу Пакистан и Авганистан