Европската Унија треба да ја разгледа можноста за привремено ограничување на одредени права на глас за идните нови членки на блокот и создавање повеќе механизми за заштита на владеењето на правото, се наведува во заедничкиот документ на Германија, Франција, Холандија, Белгија и Луксембург, до кој Ројтерс има пристап.

Во периодот кога Црна Гора се надева на членство во ЕУ во 2028 година, а Албанија, Украина и Молдавија се залагаат за напредок во нивните процеси на европска интеграција, меѓу европските влади се водат интензивни дискусии за тоа дали правилата за новите членки треба да се променат.

Од ЕУ се бара да развие посилни механизми за заштита на идните членки, делумно поради искуството на блокот со падот на демократијата во Унгарија под водство на претходниот премиер Виктор Орбан.

Документот ги наведува можните опции што би можеле да бидат вклучени во идните договори за пристапување, вклучувајќи нов механизам за следење и заштитна клаузула што би овозможила преземање мерки во случај на сериозно назадување во области како што се демократијата и слободата на медиумите.

„ЕУ треба да води длабинска дискусија за можностите за привремени, преодни ограничувања на правото на глас за новите земји-членки, особено во деловите од европското законодавство каде што е потребна едногласност“, пишуваат петте земји, посочувајќи ги одлуките за проширување, надворешна политика и буџетот на ЕУ, за кои понекогаш е потребна согласност од сите земји-членки.

ЕУ сака проширување, ама се плаши од последици