Шведската рударска компанија Болиден најави дека ќе го прекине производството во рудникот за цинк во Ирска поради финансиски проблеми предизвикани од падот на цената на цинкот и високите трошоци.

Вчера шведската рударска компанија објави прекин на работата во рудникот Тара, без да прецизира кога би можело да продолжи екстракцијата на цинк. „Активно“ работиме на продолжување на работниот век на рудникот, со зачувување на неговата конкурентност, додаваат оттаму.

„Притокот на готовина во моментов е негативен поради комбинација на фактори, вклучувајќи деловни предизвици, пад на цените на цинкот, високите цени на енергијата и општиот раст на трошоците“, рече Болиден.

Ќе го прекинеме производството и привремено ќе отпуштаме работници додека не се подобрат условите за работа, додаваат тие.

Генералниот директор на рудникот Болиден Тара, Гунар Нистром, рече дека компанијата е свесна за влијанието што одлуката ќе го има врз вработените во областа Наван.

„Во долгорочен интерес на рудникот Болиден Тара, донесовме одлука за привремено прекинување на работата. За жал, тоа ќе значи дека до 650 вработени ќе бидат привремено отпуштени. Ние сме целосно свесни за тешкотиите и промените што ќе ги донесе одлуката за нашите вработени, но и за пошироката заедница во Наван, каде што рудникот работи од 1977 година. Не ја сфативме одлуката лесно, туку едноставно мораме да го запреме сегашниот неодржлив тренд на одлив на готовина за да ја заштитиме долгорочната иднина на рудникот. Не сме сигурни колку ќе трае овој период, но веруваме дека состојбата е привремена и постојано ќе ја следиме“, рече началникот на рудникот.

Рудникот Тара има околу 650 вработени и е најголемиот рудник за цинк во Европа и осми во светот. Таа произведува 200.000 тони концентрат на цинк и 40.000 тони концентрат на олово.

Цинкот се користи комерцијално за третирање на железо и челик за заштита од корозија.