Во рамките на манифестацијата „Скопско лето“ на 11 јули се одржа промоција на збирката поезија „Побег на нештата“ од поетесата Љерка Тот Наумова. Издавач на книгата е книгоиздателството „Ми-Ан“ од Скопје, а промотор на збирката беше Марина Мијаковска.

– Љерка Тот Наумова е истакната поетеса која зад себе ни оставила вкупно деветнаесет стихозбирки. Оваа дводомна авторка (родум од Хрватска, а живее во Скопје) подеднакво твори на македонски и на хрватски јазик.

Стихозбирката „Побег на нештата“ го сублимира поетскиот здив преку ваков метафоричен наслов. За каков побег пее поетската душа? Тоа е првото прашање што ни доаѓа спонтано кога ќе го слушнеме насловот. Која е потребата на поетесата да го опева бегството, побегот? Во претходните стихозбирки таа беше инспирирана од тишината, а сега дали бегството е од светот и е повторно враќање кон тишината?

Одговорот што ќе го најдеме низ страниците и песните сублимирани во книгата е дека побегот на нештата значи катарза. Денес во овие тегобни времиња како да ни бегаат нештата од рацете, како да ја губиме контролата врз животниот тек. Непредвидливоста, дисхармонијата и дистопијата се главен именител на денешната непредвидлива егзистенција.

За поетесата Љерка светот стана состојба на превривање на кризните состојби, а за индивидуата единствен спас од лошите вести, цензури, санитарни закони, итн. е побегот кон нештата. Поезијата е длабоко емотивна, лична и рефлексивна. Постои равенство меѓу Јас поетесата Љерка и Јас на лирскиот субјект во поезијата. Авторката од свој внатрешен агол ги истресува внатрешните состојби и опстојби, таа ги исфрла од бунарот на осамата негативните емоции што ги чувствува кон светот.

Лирскиот субјект од оваа книга е збунет, разочаран, гневен, уморен од немоќта како индивидуа наспроти бучниот и загаден свет од забрани. Затоа лирскиот субјект копнее за бегството во поетскиот микросвет и се свртува кон самиот себе и сопствената внатрешност – забележа Мијаковска.

Авторката Љерка Тот Наумова на промоцијата се потсети на стих кој вели дека „радоста секогаш е поголема кога ќе се подели со други луѓе“, изразувајќи благодарност до сите присутни на промоцијата на нејзината нова книга.

(Текстот е објавен во „Културен печат“ број 137, во печатеното издание на весникот „Слободен печат“ на 16-17 јули 2022)