На повидок е војна помеѓу Реал и Барса, Лапорта сака да го минира трансферот на Халанд во Мадрид
Претседателот на Барселона, Жоан Лапорта на сите можни начини се обидува да спречи евентуалниот трансфер на Ерлинг Халанд во редовите на Реал Мадрид.
Весникот „Марка“ најавува „војна“ на двата шпански гиганти во наредните два преодни рока.
Опсесијата на Лапорта, „Марка“ ја опишува со зборовите – доколку не можеш да го победиш, тогаш барем уништи му ги плановите.
Барселона се наоѓа во големи финансиски проблеми, долгот изнесува 1.5 милијарди евра и речиси ниту еден навивач на каталонскиот тим не верува дека клубот може да се натпреварува со Реал Мадрид на трансфер пазарот во трката по најголемите ѕвезди.
Првата трансфер бомба на претседателот Флорентино Перез треба да биде Килијан Мбапе и челникот на Барселона некако се помирил со овој трансфер, но паника предизвикаа информациите дека на лето на „Сантијаго Бернабеу“ може да пристигне и Ерлинг Халанд.
„Марка“ пишува дека токму ова е главната причина за минатонеделната средба на Лапорта со агентот на Халанд, Мино Рајола. Наводно, Лапорта се обидел да му објасни на Рајола дека Барселона до идното лето би требало да има далеку поголем буџет за трансфери, дека ќе се подобри финансиската ситуација со потпишување на договори со инвестициски фондови и му порачал дека ќе може и каталонскиот тим да се вклучи во трката по потписот со одличниот напаѓач.