На денешен ден, 20 април, во 1982 година во Скопје почина Ацо Шопов, еден од најголемите македонски поети, преведувач, член на МАНУ и великан на македонската книжевност. Шопов е автор на првата повоена книга на македонски јазик во слободна Македонија, симбол на борбата за македонскиот јазик и култура.

Роден во Штип во 1923 година, Шопов уште како гимназијалец во 1940 година станува член на СКОЈ, а во 1942 година се вклучува во антифашистичката борба во редовите на Третата македонска ударна бригада. По војната, ги завршува студиите по филозофија во Скопје и го посветува животот на издавачката дејност, работејќи како уредник и долгогодишен директор на „Македонска книга“.

Трагедијата на Вера Јоциќ и антологиската „Очи“

Еден од најемотивните моменти во неговиот живот и творештво е врзан за неговата љубена, Вера Јоциќ. Таа загинува во мај 1944 година како партизанка, а Шопов ѝ ја посветува легендарната песна „Очи“. Оваа антологиска песна е сведоштво за трите дена во кои борците на раце ја носеле својата ранета другарка низ планините, чекајќи го нејзиното последно здивнување.

Во 1971 година, Шопов е именуван за амбасадор на Југославија во Сенегал. Престојот во Африка станува инспирација за неговата позната збирка „Песна на црната жена“. Во овој период тој го преведува и сенегалскиот претседател и поет Леополд Седар Сенгор, кој подоцна станува лауреат на Струшките вечери на поезијата.

Основач на нови поетски правци

Творештвото на Ацо Шопов е обележано со низа пионерски и влијателни поетски остварувања. Неговата збирка Песни (1944) се вбројува меѓу првите книги на современ македонски јазик објавени во текот на Народноослободителната борба. Со Слеј се со тишината (1957) тој создава дело што е меѓу раните македонски поетски збирки преведени и афирмирани надвор од земјата, вклучително и на словенечки јазик. Збирката Јус-универзум (1968) претставува значаен исчекор кон сатиричен и експериментален израз во македонската поезија. Неговиот препев на Хамлет се смета за едно од највредните и највлијателни достигнувања во македонската преведувачка традиција.

Шопов беше еден од првите членови на МАНУ (избран во 1967 година) и добитник на највисоките државни и литературни награди, меѓу кои „АВНОЈ“, „Кочо Рацин“, „11 Октомври“ и „Браќа Миладиновци“.

Денес, Друштвото на писателите на Македонија ја доделува престижната награда „Ацо Шопов“ за најдобра поетска книга, со што го чува споменот на поетот кој со своите стихови ја внесе македонската лирика во современите светски текови.