Министерството за внатрешни работи предупредува за нова интернет измама преку која граѓани добиваат пораки за наводен сообраќаен прекршок и лажна наплата на казна.

Од Секторот за компјутерски криминал при Бирото за јавна безбедност и Одделението за сајбер безбедност информираат дека во изминатите денови непознати лица преку странскиот телефонски број +639606963624 испраќаат СМС пораки до македонски корисници со известување за наводно сторен сообраќаен прекршок.

„Слободен печат“, во меѓувреме, дојде до вакви пораки кои деновиве се испратени од друг број, кој исто така е со меѓународниот повикувачки број за Филипините – +63.

Во пораките има линк што води до лажна веб-страница која визуелно наликува на страницата на МВР – http://mvr.govmk.cam/mk. Од граѓаните се бара да внесат регистарска табличка од возилото, по што се прикажува наводен прекршок и барање за уплата од 1.500 денари со платежна картичка.

-Апелираме до граѓаните да бидат претпазливи и да не веруваат на пораки кои доаѓаат од нелегитимен веб-сајт на Министерството, ниту да оставаат свои лични податоци и податоци од својата платежна картичка, кои потоа претставуваат цел на злоупотреба – велат од МВР.

Надлежните апелираат граѓаните и правните субјекти да не отвораат сомнителни линкови и прикачени документи од непознати или неверификувани испраќачи, со цел да не станат жртви на ваков тип измами.

Претседателот на Уставен Костадиновски го испофали „Безбеден град“ пред Судот да одлучува по четири претставки со кои проектот се оспорува