Кремљ е во постојан контакт со иранското раководство и Москва е подготвена да придонесе за враќање на мирот и стабилноста во регионот, соопшти денес Кремљ, пренесува Тасс.

„Сè што можам да кажам е дека сме во постојан контакт со иранската страна и со иранското раководство“, изјави за новинарите портпаролот на Кремљ, Дмитриј Песков.

„Како што рече претседателот Владимир Путин, Русија е секогаш подготвена да направи сè што може за да го врати мирот и стабилноста во регионот“, додаде тој.

Путин и министерот за надворешни работи Сергеј Лавров разговараа со своите ирански колеги последниве денови, додека рускиот претседател разговараше и по телефон со американскиот претседател Доналд Трамп во понеделникот.

Во врска со војната во Украина, Кремљ објави дека британски специјалисти биле вклучени во смртоносниот украински напад врз рускиот град Брјанск користејќи британски ракети „сторм шедоу“ (ур.: крстосувачки ракети со долг дострел произведени во Велика Британија и Франција).

Песков додаде дека „специјалната воена операција“, како што ја нарекува Москва, ќе продолжи да спречува вакви „варварски“ напади.

Во нападот во Брјанск во вторникот загинаа најмалку шест лица, а 37 беа ранети.

Украина соопшти дека погодила фабрика што произведува компоненти за ракети, додека Москва вели дека Киев ги таргетирал цивилите.

Големите прекини и проблеми со интернетот што се случија во Русија во последните денови ќе продолжат „колку што е потребно“ за да се обезбеди „безбедноста на граѓаните“ од украинските закани, додаде Песков.

„Режимот во Киев користи сè пософистицирани методи за своите напади, а технолошките контрамерки се неопходни за да се обезбеди безбедноста на граѓаните“, рече тој.

Според Песков, следната рунда трилатерални разговори за Украина веројатно ќе се одржи во Истанбул, но сè уште нема конкретни детали, освен перцепцијата дека мировниот процес ќе продолжи.

Русија и Украина одржаа три рунди разговори во турскиот град минатата година. Преговорите со посредство на САД се одржаа оваа година во Абу Даби и Женева.