Не секоја монета од еврото има иста вредност. Кај колекционерите, одредени производствени грешки или ненамерни дефекти при ковање можат да достигнат значителни цени на пазарот. Еден таков пример е монета од 1 евро од Монако.

Според германски медиуми, кај конкретната монета од 1 евро, кована во 2007 година, недостасува важен детал. Вообичаено, под ликот на принцот Албер II се наоѓа годината на ковање и симболот на ковницата, пренесува „Н1“. Сепак, кај дел од примероците, токму овој симбол недостасува.

Станува збор за ограничена серија од околу 2.291 монета, што ја прави особено ретка. Поради тоа, колекционерите се подготвени да платат и до 500 евра за ваков примерок.

Иако ваквите наоди се ретки, постојат неколку типични производствени аномалии кои се барани на колекционерскиот пазар:

– Ротација на матрицата: ако задната страна на монетата е свртена наопаку, вредноста може да достигне и до 200 евра.
– Погрешна подлога (планшета): ако дизајн од друга монета (на пример од 2 евра) се појави на монета од 1 евро, вредноста може да порасне и до 650 евра.
– „Ефект на пржено јајце“: кога внатрешниот дел на монетата е неправилно обликуван, наместо совршено кружен, цената може да достигне околу 100 евра.

Стручните здруженија предупредуваат дека не треба да се верува на нереални понуди, особено на интернет. Според нив, тврдења за цени од пет или шест цифри за вакви грешки се претерани и неточни. Исто така, многу „наводни грешки“ се всушност нормално истрошени монети или мали варијации кои не влијаат значително на вредноста.

Бидејќи во Европа се исковани повеќе од 150 милијарди евромонети, мали отстапувања се сосема очекувани, наведуваат експертите.

Вистинските грешки во ковањето се исклучително ретки. Доколку некој навистина поседува монета од 1 евро од Монако без симболот на ковницата, не значи дека автоматски ќе се збогати. Колекционерски интерес постои и за монети од 1 евро од Сан Марино и Ватикан, кои се ретки и често се издвојуваат во нумизматичките збирки.