Министерството за образование и наука првпат оваа учебна година воведе ромски образовни медијатори и во средното образование, со цел унапредување на инклузивноста и намалување на осипот на ученици од ромската етничка заедница. Преку јавен повик беа избрани 20 лица кои ќе работат директно со средношколци и нивните семејства во надминување на образовните и социјалните предизвици со кои се соочуваат.

Новите медијатори денеска ги потпишаа договорите за работен ангажман и остварија средба со министерката за образование и наука, Весна Јаневска.

„Имаме голем успех со ромските образовни медијатори во основното образование и очекувам исти такви резултати и во средното. Вашата работа е благородна, комуницирајте со родителите, соработувајте со училишните служби, вклучувајте ги учениците кои не посетуваат настава и помагајте им во образувањето и остварувањето на нивните права. Знаењето е основна алатка за успех“, истакна Јаневска.

Таа информираше дека во тек е и нов јавен повик за ангажирање дополнителен број ромски образовни медијатори, со што ќе се зајакне поддршката на учениците од оваа заедница.