Младиот кромид е одличен извор на витамин К, витамин А, витамин Ц и фолати. Станува збор за нискокалорична намирница со малку масти, но не е особено богат извор на протеини, пишува „Е-клиника“.

Денес е достапен во текот на целата година, но највкусен и најздрав е напролет, кога му е сезоната. Целиот млад кромид е јадлив – и белиот дел (коренот) и зелените листови. Луковицата има поблаг вкус во споредба со стариот кромид.

Младиот кромид содржи малку јаглехидрати. Едно стебло млад кромид има нешто повеќе од 1 грам јаглехидрати, од кои околу половина се влакна, а остатокот шеќери. Како и кај повеќето нескробни зеленчуци, не се мери со гликемиски индекс, но се смета дека има низок ГИ. Со тоа, и гликемиското оптоварување е многу ниско, што значи дека не го зголемува нивото на шеќер во крвта.

Според истражувањата, младиот кромид има позитивни метаболни ефекти кај лицата со дијабетес, бидејќи помага во одржување на нивото на триглицериди. Содржи и флавоноиди кои влијаат врз нивото на шеќер во крвта, па е погоден за лица со дијабетес тип 1 и тип 2.

Здравствени придобивки од младиот кромид

Младиот кромид е добар извор на витамин Ц, кој го зајакнува имунолошкиот систем. Содржи антиоксиданси што помагаат во заштита од хронични болести и може да придонесе за намалување на крвниот притисок поради високата содржина на калиум. Исто така, го подобрува здравјето на коските и го намалува ризикот од остеопороза.

Богат е со витамини, особено А, Б1, Б2, Б3, Б5, Ц, К и Е.

Редовната консумација на млад кромид носи бројни здравствени придобивки:

• Богат е со влакна кои даваат чувство на ситост и помагаат во варењето.
• Го намалува нивото на холестерол и може да го намали ризикот од дијабетес, срцеви заболувања и други состојби.
• Помага во борбата против рак – зеленчукот од семејството алиум може да го блокира растот на канцерогените клетки, особено во желудникот. Соединението алицин, кое му го дава специфичниот вкус, може да го спречи нивното создавање или да го забави ширењето на туморите.
• Спречува бактериски инфекции – екстрактите од млад кромид и лук имаат антимикробно дејство и можат да делуваат против бактерии, габи и вируси.
• Го намалува ризикот од разни заболувања благодарение на фитонутриентите и антиоксидансите (флавоноиди и полифеноли) кои ги неутрализираат слободните радикали.
• Го зајакнува имунитетот – благодарение на витамин Ц и флавоноидот кверцетин.
• Има потенцијално дејство против габични инфекции – истражувањата покажуваат активност против габи како Aspergillus niger и Aspergillus parasiticus.
• Делува против воспаленија – содржи биоактивни соединенија како тиосулфинати кои имаат антиинфламаторно дејство.

Младиот кромид е едноставна, достапна и исклучително корисна намирница што лесно може да се вклучи во секојдневната исхрана.