Младинскиот состав на Пелистер до 18 години направи голем исчекор на турнирот во Пореч, откако во драматичен полуфинален натпревар го совлада дански Алборг со 24-23 и обезбеди пласман во финалето, каде ќе се бори за место на завршниот турнир во Келн.

Битолчани одиграа храбро и дисциплинирано против силниот скандинавски противник, покажувајќи карактер кога беше најпотребно. Натпреварот беше целосно израмнет до самиот финиш, а победникот се решаваше во последните секунди.

Пелистер имаше минимална предност во самиот крај, а Алборг доби шанса да нападне за израмнување, но не успеа да ја искористи, по што следуваше голема радост кај македонскиот тим.

Најзабележителен на теренот беше Андреј Георгиев со 12 погодоци, додека значаен придонес даде и Јован Симовски, кој реализираше шест пати.

Во второто полуфинале ќе се соочат Загреб и Фуксе Берлин, а победникот од таа пресметка ќе биде следниот ривал на Пелистер во борбата за место на Фајнал фор турнирот.