Мираковски: Со четири натпревари за осум дена, невозможно е да одиграме добро
Тренерот на Работнички, Димитар Мираковски очекувано не е задоволен од прикажаната игра на неговите кошаркари во поразот од Студентски центар од 98:68, но вината не ја гледа во неговиот тим туку во заморот и набиениот распоред на натпревари.
– Студентски центар е фаворит број еден за влез во АБА лигата. Им честитам на победата. Едно можам да кажам, среќа што не се повреди некој. Ова е четврти натпревар за нас во осум дена, имавме дерби против МЗТ Скопје, а патувавме и 1.000 километри за да дојдеме до Златибор. Физички невозможно беше за нас да играме на овој наптрвеар. Уште еднаш честитки за противникот, а ние ќе гледаме да се одмориме во наредните два дена за да можеме да пружиме подобри игри во продолжение од турнирот. Имаме лоша среќа да мора да играме 8-9 натпревари за 18 дена, а нашето барање да ни биде одложен натпреварот од домашното првенство против Кожув не беше прифатено – изјави Мираковски по натпреварот.
Нареден противник на Работнички во „меурот“ на Златибор ќе биде тимот на Подгорица кој утре ќе игра против вториот македонски тим, МЗТ Скопје.