Претседателот на ракометниот клуб Вардар 1961, Михајло Михајловски на денешниот брифинг со новинарите кажа дека играчите на екипата ќе се преселат во Расадник до крајот на јануари.

Таму скопските „црвено-црни“ ќе тренираат и ќе играат помали натпревари, додека поважните мечеви ќе бидат во СЦ „Јане Сандански“.

Воедно, Михајловски изјави дека клубот бара двајца Македонци за следната натпреварувачка сезона, кои би имале важна улога во тимот.

Вардар предводен од тренерот Иван Чупиќ има до сега одлична сезона, моментно е првопласиран во домашната Супер лига, а во ЕХФ Европската лига го освои првото место во групата Ф за пласман во главната фаза во која ќе игра против Мелсунген и Бенфика.

Во средата, клубот ја извести јавноста дека продолжен е договорот со француското лево крило Џуниор Тузолана до 2027 година. Исто така, од јануари ќе дојде и новото засилување, бразилскиот среден бек Жоао Педро да Силва кој потпиша договор до јуни 2028 година.