Премиерот Христијан Мицкоски доставил до Собранието предлог за именување двајца нови заменици-министри во Владата, информираат од „Илинденска“.

Во дописот упатен до претседателот на Собранието, Африм Гаши, премиерот предлага Адмир Шабани да биде именуван за заменик-министер во Министерството за одбрана, додека Дритон Сулејмани е предложен за заменик-министер во Министерството за образование и наука. Заменик-министер во МОН досега беше Љуљзим Алиу, а во одбрана – Елфет Исмаили.

Од Владата појаснуваат само дека предлогот е поднесен согласно член 48 од Законот за организација и работа на органите на државната управа. Во прилог на дописот се доставени и биографиите на предложените кандидати, како дел од редовната законска процедура.

Собранието треба да го разгледа и да се изјасни по предлогот на некоја од наредните седници, согласно утврдената постапка.

„Со овие предлози се очекува дополнително екипирање на раководните структури во клучните ресори, со цел поефикасно функционирање на институциите и реализација на владините приоритети“, велат од Владата.