Металург со два гола предност ќе гостува во Швајцарија
Вечерва во првиот натпревар од второто квалификациско коло за пласман во групите на Лига Европа, македонскиот ракометен клуб Металург со 26:24 го совлада швајцарскиот состав на Криенс.
Овој резултат не гарантира мирно гостување во Цирих на 29 септември, но играчите на тренерот Зоран Кастратовиќ ќе се обидат да ја одбранат предноста и се пласираат во групите на ново формираното европско клупско натпревање каде што веќе се наоѓа екипата на Еурофарм Пелистер.
После првото полувреме во Спортскиот Центар „Јане Сандански“ во Скопје тимот од Автокоманда имаше позитива од 14:13.
Златко Хорват и Марко Тарабокиа беа најрасположени на мечот во редовите на Металург со по осум голови, потоа по три имаа Кондев и Серафимов, а по еден Поповиќ, Мариќ, Лазаревски и Додиќ.
На спротивната страна шест погодоци беа дело на Папеж, по четири запишаа Ванер и Лапајне.
Во другите средби од денешната програма во Лига Европа: Азоти Пулави-Кристијанштад 24:25, Бјерингбро/Силкеборг-ЦСКА Москва 26:23, Доброгеа Суд-Спортинг 27.27, ГОГ-Винтертур 33:24, Ѓенѓеш-Фуксе Берлин 23:25, Холстебро-Рајн Некар 22:28, Скјерн-Монпеље 31:30, Бидасоа Ирун-Нексе 30:27, Бенидорм-АОН Фиверс 34:31, Потаиса Турда-Тулуз 35:35.