Металург го претрпе и вториот пораз оваа сезона во ракометната Лига Европа, вечерва во Шпанија загуби од Адемар со 41:32.

Можеби и самиот долг пат до Леон си го направи своето, играчите мора да патуваат дури 3000 километри поминати за 43 часа.

Во ниту еден момент од натпреварот „сино-белите“ во Автокоманда не беа во водство, имаше барем некаква резултатска неизвесност во првите 15-20 минути кога ривалот водеше со само два-три голови позитива, но потоа до паузата започна брзата и ефикасна реализација на домаќините.

Шпанците стигнаа и до „плус девет“, нешто беше намалено од негативата, па ривалот имаше „само“ 20:13 по првите 30 минути. Ништо не се промени во вториот дел, Адемар одигра уште подобро, најголемата негова предност изнесуваше 38:24, а до крајот Металург повторно само успеа нешто да намали за конечни 41:32.

Кај нашиот претставник први стрелци беа Поповиќ со осум и Хорват со шест голови, а во победничките редови доминираше Криадо Марчан со осум погодоци.