„Металците“ драстично ослабени ќе бркаат плејоф во АБА2 лигата
Екипата на МЗТ Скопје Аеродром ќе биде драстично ослабена на претстојниот турнир од АБА2-лигата кој ќе се игра на Златибор, бидејќи во последен момент од тимот отпаднаа дури тројца кошаркари и двајца од стручниот штаб.
„Металците“ за Златибор заминаа Американците Феми Олуџоби и Хасани Гравет, кои се посериозно повредени. Олуџоби потешко го повреди коленото, за кое лекарите се сомневаат дека има скинати предни лигаменти, но оваа дијагноза допрва треба да се потврди. Доколку е точна првичната дијагноза, тогаш за Олуџоби заврши сезоната. Хасани Гравет пак, има повреда на задната ложа, која воопшто не е наивна и поради која ќе мора да мирува најмалку две недели, а потоа ќе треба да мине и низ период на рехабилитација.
Во Скопје остана и Андреј Магдевски, кому денеска му завршува периодот на изолација по прележаниот коронавирус, поради кој ги пропушти последните средби како и голем број тренинзи. Репрезентативниот бек во договор со тренерот Дарко Радуловиќ договори дека е подобро да не се ризикува и да остане во Скопје.
На пат кон Златибор не тргнаат ниту новите членови на стручниот штаб, Васко Атанасов и Михајло Шејкеровски, кој ќе ја има улогата на кондициски тренер, кои исто така беа позитивни на последната проверка за Ковид-19 пред тргнувањето кон Србија.
Поради сето ова, МЗТ Скопје Аеродром на средбите против Спарс (вечерва од 21 часот), Горица (четврток) и Златибор (недела) ќе настапи со девет кошаркари во ростерот, кои ќе дадат се од себе за да го надоместат отсуството на Магдевски, Гравет и Олуџоби.