Меси одлучи каде ќе ја продолжи кариерата
Весникот „Марка“ пренесува ексклузивна информација која со нетрпение ја очекуваат навивачите на Барселона и сите фудбалски фанови.
„Марка“ пишува дека Лионел Меси е најблиску до останување во Барселона и по истекот на договорот, но тоа е условено со неколку услови кои клубот треба да ги исполни.
„Извори од Барселона не уверуваат дека останувањето на Меси по истекот на договорот ова лето е најреална опција и дека Лео е поблиску до останување отколку до заминување. Ги контактиравме луѓето блиски до Меси и тие ни го кажуваат истото и тоа со зборовите: До пред неколку месеци неговото заминување беше повеќе од извесно, но сега ситуацијата радикално се смени“, пишува „Марка“ и додава дека ПСЖ дефинитивно отпаѓа како комбинација:
„Меси е огорчен што челниците на ПСЖ зборуваат дека ќе го ангажираат, како и поради насловните страници во француските медиуми на кои тој беше претставен во дресот на ПСЖ. Причината за огорченоста е бидејќи никогаш немало никакви контакти со ПСЖ, а ги одби сите менаџери кои му доаѓаа со понуди од останатите клубови. Исто така неговиот татко Хорхе, кој е задолжен за неговата кариера, долго време е во Аргентина и нема никакви контакти со заинтересираните екипи“.
Изворите на „Марка“ објаснуваат дека промената во ставовите на Лионел Меси се случи по оставката на најомразениот претседател на Барселона, Хосеп Марија Бартомеу, и неговиот наследник ќе биде избран наредниот викенд. Главен фаворит на претседателските избори е поранешниот претседател Жоан Лапорта, кој има одлични односи со Меси и неговиот татко и тоа е главниот услов за Меси да седне на преговарачка маса со новата управа. Изворите велат дека Аргетинецот не сака да соработува со останатите двајца кандидати Виктор Фонд и Тони Фреикса кој се смета за човек на омразениот Бартомеу.
Доколку Лапорта стане нов претседател, Меси ќе размисли да потпише нов договор под одредени услови, а тоа е спортскиот проект, односно засилувањата кои се планираат на лето.
„Најважна ќе биде презентацијата на проектот на новата Барселона, а Меси ќе инсистира на ангажирање на квалитетни засилувања. Прво засилување треба да биде неговиот добар пријател Серхио Агуеро, а потоа и Џорџињо Вајналдум. И двајцата фудбалери може да дојдат во Барселона како слободни играчи. Во секој случја, клучот за останувањето на Меси е во вистинските засилувања“, го завршува „Марка“ својот текст за Лионел Меси.