Меси ја критикуваше Барселона: Ништо повеќе не ме изненадува!
Лионел Меси со поддршка за својот досегашен соиграч Луис Суарез кој го напушти „Камп Ноу“ после поминати шест години во клубот.
Суарез си заминува од Барселона како еден од најдобрите напаѓачи кој клубот го имаше во 21 век, а и генерално во историјата.
Но, Каталонците не се однесуваа така според него, што ниту малку не му се допадна на Меси, а како што вели Аргентинецот во најновата објава на Инстаграм, „веќе ништо не може да го изненади“.
– Ќе ми биде навистина тешко што нема да продолжам да ги поминувам деновите со тебе, во и надвор од теренот. На сите ќе ни недостасуваш. Поминавме многу години заедно, многу работи кои никогаш нема да ги заборавам. Ќе ми биде чудно да те гледам во поинаков дрес, а уште почудно да играм против тебе.
Заслужуваш да си одиш како еден од најважните играчи во историјата на клубот, постигна многу, како со тимот, така и индивидуално, а не да те „шутнат“ на начин начинот кој тие го направија тоа. Но, вистината е дека ништо повеќе не може да ме изненади во овој момент. Ти посакувам сè најдобро. Те сакам, се гледаме наскоро пријателе – напиша Меси на „Инстаграм“.