Антоан Гризман е се поблизу до трансфер во Барселона, неговиот адвокат денеска треба да пристигне во Каталонија на завршни преговори, но нема да биде пречекан со раширени раце од играчите на „Камп Ноу“ кои не го сакаат Французинот во соблекувалната.

Предводник на бунтот во Барселона, е најголемата ѕвезда, Лионел Меси, кој им кажал на соиграчите дека не се точни онформациите дека веќе разговарал со Гризман и дека едвај чека да пристигне на „Камп Ноу“. Имено, Меси како и поголемиот дел од постарите фудбалери се гневни на Гризман бидејќи минатото лето иако вети, на крајот си го погази зборот и остана во Атлетико Мадрид.

Постарите фудбалери кои излегоа од академијата на Барселона, веќе му соопштиле на претседателот Бартомеу дека Гризман минатата година го искористил каталонскиот клуб за да си издејствува поголема плата и не сакаат некој да си игра со името на клубот.

Играчите но и самиот тренер Ернесто Валверде кој доби поддршка од управата, сметаат дека Гризман не им е неопходен во тимот, на истата позиција игра Осман Дембеле кој имаше одлична сезона, а подобро би било парите да се вложат во ангажман на Матијс де Лихт од Ајакс и за купување на напаѓач кој би бил замена за Луис Суарез.