Матијашевиќ пред ЕП: Со лош прием, не можеме да организираме напад! – Слободен печат
ОстанатoСпорт

Матијашевиќ пред ЕП: Со лош прием, не можеме да организираме напад!

По вчерашниот слободен ден, македонските одбојкари се вратија на тренинзите пред настапот на турнирот „Бранко Хаџииљоски Чајка“ којшто годинава ќе биде во рамки на подготовките за нашето премиерно учество на ЕП.

Со Швеѓаните во „Кале“ во петокот победивме, а во неделата загубивме, во натпревари исполнети со по пет сета, а селекторот Никола Матијашевиќ заклучува дека треба уште многу елементи да се подобрат за да играме на посакуваното ниво пред дебитантскиот настап на Европското првенство.

– Не сум задоволен со квалитетот на играта против Шведска. Имавме лош прием, тие доминираа во сервисот и тоа не смее да ни се случува. Наш најсилен елемент е нападот, а доколку немаме добар прием не можеме да организираме напад, немаме прво темпо, едноставно не можеме да играме. Јас дури мислев дека ќе биде полошо на вториот натпревар со оглед на отсуството на капитенот, но блокот беше подобар, па бевме рамноправни – рече Матијашевиќ.

фото: ОФМ

Одбојкарите утрово тренираа во сала за кревање товар, а попладне ќе работат со топка, но Матијашевиќ се уште има дилеми како да ги дозира подготовките, затоа што некои играчи се уште се жалат на повреди.

– Никола Ѓорѓиев е во ред, саниран е отокот на квадрицепсот поради којшто не играше на втората контрола со Швеѓаните, но либерото Дарко Ангеловски има стомачен вирус. Претходно со таков проблем се соочи Васе Михаилов, а Филип Маџунков се жали и на коленото и на рамото, но болките не беа од таква природа за да одмора против Шведска – додаде селекторот.

До Европското првенство во Франција, Холандија, Белгија и во Словенија има уште 15 дена, а покрај тренажниот процес, најавени се нови контролни мечеви.

В петок и в сабота во салата „Кале“ во Скопје ќе биде одржан традиционалниот 43-ти турнир „Бранко Хаџииљоски Чајка“ на којшто гости ќе ни бидат Белгија, Бугарија и Украина. Во полуфиналето в петок, од 17.30 часот македонскиот национален состав ќе игра со Украина, а од 20.15 ќе се сретнат Бугарија и Белгија.

Потоа, на 6 и 7 септември ќе и гостуваме на Австрија во Сент Полтен, а на 12 во арената „Стожице“ во Љубљана (Словенија) ќе го одиграме првиот натпревар на Европското првенство, а противник ќе ни биде Финска.

Преземањето на оваа содржина или на делови од неа без непосреден договор со редакцијата на Слободен Печат значи експлицитно прифаќање на условите за преземање, кои се објавени на сајтот.

Тагови

Напишете коментар

Вашата адреса за е-пошта нема да биде објавена. Задолжителните полиња се означени со *

Close