Повеќе од 300 луѓе, меѓу кои жени и деца, киднапирале исламските милитанти во напад на град на североистокот на Нигерија, потврдија локални претставници. Милитантни борци упаднале во градот Нгоше во сојузната држава Борно, пишува Скај њуз.

Одмазда за убиство на команданти

Булама Сава, претставник од подрачјето Гвоза, изјави дека засега ниту една група не презела одговорност. Според неговите зборови, најверојатно станува збор за одмазда за неодамнешното убиство на тројца команданти на милитантната група Боко Харам, кое го извела нигериската војска.

Низа напади низ регионот

Портпаролот на војската Уби Сани извести и за одвоени напади што се случиле меѓу средата и петокот во населбите Кондуга, Марте, Јакана и Маинок.

Тој рече дека воените сили ги одбиле тие напади, но дека „низа храбри војници ја платиле највисоката цена извршувајќи ја својата должност“, меѓу кои и еден повисок офицер.

Не изнесе повеќе детали за воените жртви ниту за жртвите од инцидентот. Нападите ги опиша како „неуспешни обиди“ кои покажуваат „растечки очај на терористичките елементи под постојан оперативен притисок“ на бојното поле.

Масовните киднапирања се сè почести

Масовните киднапирања стануваат сè почеста појава во Нигерија, каде вооружени банди целат кон оддалечени заедници со ограничено присуство на безбедносни сили и државни институции.

Улф Лесинг од Фондацијата Конрад Аденауер вели дека војската се бори со контролата на големи делови од земјата каде делуваат џихадистички групи.

Додава дека милитантите користат беспилотни летала за извидување цели и профитираат од засилената прекугранична соработка.

Војската, како што вели, „се бори против дух – борци кои на мотоцикли се спуштаат во селата и исчезнуваат во грмушките пред војската да стигне да реагира навреме“.

Кои се киднаперите?

Меѓу најистакнатите исламски милитантни групи се Боко Харам и нејзината фракција Исламска држава Западноафриканска провинција, поврзана со Исламската држава.

Тука е и групата Лакурава, исто така поврзана со Исламската држава, како и други „бандитски“ групи специјализирани за киднапирања за откуп и нелегално рударство.

Кризата неодамна се влоши со вклучување на милитанти од соседниот регион Сахел, како што е групата Џамаат Нусрат ал Ислам вал Муслимин, која минатата година презеде одговорност за својот прв напад на нигериско тло.

Аналитичари: Владата не прави доволно

Во јануари вооружени бандити киднапираа повеќе од 150 христијани во истовремени напади на неколку цркви.

Во ноември минатата година вооружени напаѓачи киднапираа повеќе од 300 ученици и 12 членови на персоналот од католичко училиште во сојузната држава Нигер.

Некои успеале да побегнат, други биле спасени, а преостанатите 130 деца биле пуштени непосредно пред Божиќ.

Според податоците на Обединетите нации, во Нигерија се убиени неколку илјади луѓе. Аналитичарите сметаат дека владата не прави доволно за да ги заштити своите граѓани.

Најмалку 25 луѓе се убиени во напади во две села во Нигерија, запалени се и куќи

ВИДЕО | Божиќен удар на САД врз терористите на ИСИС во Нигерија