Најмалку 25 луѓе се убиени, а повеќе куќи запалени откако вооружени напаѓачи влегле во две села во сојузната држава Адамава, во североисточна Нигерија, соопштија жителите и гувернерот на државата, пренесува Ројтерс.

Нападнати се Кирчинга во округот Мадагали и Гараха во соседниот округ Хонг, две села на работ на шумата Самбиса.

Двата напада ја истакнуваат долготрајната несигурност во североисточна Нигерија, епицентарот на 17-годишниот исламистички бунт, и покрај повеќегодишните воени кампањи.

Абубакар Лаван Канури, селскиот старешина на Кирчинга, за Ројтерс изјави дека напаѓачите пристигнале вчера вечерта облечени во воени униформи, што првично ги навело жителите да помислат дека станува збор за војници на патрола. Тој рече дека биле пронајдени 18 тела откако вооружените лица поминале низ заедницата.

„Во Гараха, седум лица беа убиени кога напаѓачи на повеќе од 50 мотори влегоа во селото и ја нападнаа блиската воена база“, изјави локалецот Муса Иса, кој додаде дека „едвај избегал“.

Напаѓачите влегле од неколку правци, при што убиеле тројца војници. Четворица жители кои бегале биле застрелани, а било запалено и училиште.

„Многу селани оттогаш побегнаа во Муби, најблискиот поголем град“, рече Иса.

Гувернерот на државата Адамава, Ахмаду Умару Финтири, ги осуди нападите како „кукавички акти на тероризам“.

„Ветувам дека нема да дозволам  терористите да ги поткопаат нашите напори за враќање на мирот и стабилноста“, се наведува во соопштението од неговиот портпарол.