Македонските ракометарки ќе бидат наградени со два милиони денари за пласманот на ЕП 2024
Раководството на Ракометната федерација на Македонија (РФМ), денеска оствари средба со сениорките и со стручниот штаб на женскиот сениорски национален тим.
Непосредно по враќањето на женската ракометна репрезентација од Баку, која во рамки на квалификацискиот циклус за пласман на ЕП, триумфирајќи над домаќините на теренот, извојува пласман на овогодинешното Европско првенство кое ќе се одржи Австрија, Унгарија и Швајцарија во периодот 28 ноември до 15 декември 2024 година.
Претседателот на РФМ, Живко Мукаетов се заблагодари на ракометарките и на стручниот штаб за севкупното залагање и придонес за пласманот, напоменувајќи дека во овој квалификациски циклус се отиде чекор напред, покажаа дека вредат и местото им е учество на завршниот континентален турнир. Имајќи предвид дека женската ракометна репрезентација успеа да се пласира на ЕП преку квалификации по цели 12 години, УО на РФМ претходно донесе одлука за пласманот на ЕП женската национална селекција да добие награда во износ од два милиони денари.
Ова е седмо континентално учество, а второ последователно на женската национална селекција на најсилното континентално натпреварување, откако во 2022 година Скопје беше домаќин на ЕП, а Европската куќа на ракометот објави дека на 18 април во Виена, во 18 часот ќе биде извлекувањето на групите.
Последниот натпревар од квалификацискиот циклус со селекцијата на Литванија, ќе се одигра на 7 април (недела) од 18 часот во СЦ „Борис Трајковски”, а влезот во салата е слободен. РФМ ја повикува јавноста да им се даде поддршка на девојките и заеднички да го прославиме пласманот на ЕП 2024.