Непосредно пред новите репрезентативни обврски, Аријан Адеми уште еднаш блескаше во дресот на Динамо Загреб во најквалитетната хрватска лига.

Македонскиот репрезентативец се наоѓа во одлична форма пред важните натпревари во Лигата на нации против Грузија и Бугарија.

Нашиот играч постигна еден гол во победата на „модрите“ против Локомотива за вкупно деветта победа во шампионатот и моментно прво место со 28 бодови, 11 повеќе од второпласираниот Хајдук Сплит.

Поради новите добри перформанси Адеми се најде и во тимот на колото со трета највисока оценка 7,9.

Досегашниот учинок на Адеми е четири голови и две асистенции во 15 настапи во сите натпреварувања сезонава.