Ракометната репрезентација на Македонија со пораз од Словенија од 25:27 го започна настапот на Европското првенство. Иако неколку минути пред стартот на натпреварот пристигна најлошата вест за „црвено-жолтите“, Кирил Лазаров поради повреда на потколеницата нема да може да игра и ќе има само една улога, селекторската, ракометарите одиграа одличен наптревар против фаворизираната Словенија, но на крајот загубија со 25:27.

Младите ракометари одиграа одлично, но го платија данокот на неискуството, односно во моментите кога се кршеше резултатот, не се снајдоа најдобро, правеа технички грешки, и тоа го искористија Словенците за на крајот да слават.

Ракометарите одлично го започнаа натпреварот, Филип Талевски го отвори резултатот, а по трите одбрани на Мартин Томовски, „црвено-жолтите“ во петтата минута по головите на Пешевски и Велковски поведоа со 3:0. Во седмата минута по голот на Цветан Кузмановски, Македонија поведе со 4:1, но потоа следеше црн период од пет минути без гол.

Техничките грешки во нападот беа казнети од Словенците кои направија серија од 0:6 и победоа со 4:7 во 12 минута, по што Лазаров мораше да повика тајм-аут. По тајм-аутот, реализацијата се подобри и по двата гола по ред на Филип Кузмановски, во 18 минута, резултатот беше израмнет 8:8. Потоа повторно следеше период во кој ракометарите на двете селекции не можеа да погодат, за пет минути игра се постигнаа само два гола за 9:9, но во финишот Словенците беа поумешни, ги искористија своите шанси на одмор заминаа со предност од три гола 10:13.

Второто полувреме започна како и првото, со гол на Македонија преку Филип Кузмановски, но во 33. минута Словенија го имаше најголемото водство на натпреварот од 17:12. Противникот постигна два брзи гола по техничките грешки во нападот и тоа во моменти кога голот беше празен поради играта 7 на 6.
Талески и Цветан Кузмановски со два брзи гола намалија на 17:14 по што следуваше период во кој се играше гол за гол за во 38 минута по голот на Филип Кузмановски, „црвено-жолтите“ дојдоа на минус еден (18:19). Словенците веднаш преку Цехте поведоа со два гола, по што „црвено-жолтите“ не реализираа неколку напади и тоа го казни Цехте за 18:21 во 46 миунута. Филип Кузмановски намали на 19:21, но Благотиншек во следниот напад повторно и носи предност на Словенија од три гола.

Цветан Кузмановски во 50 минута од пенал намали на 20:22, но повторно Мацковчек стрела за Словенија. Младиот Кузмановски во 52 минута го постигна својот петти гол со кој намали на 22:23. Слковенците возвратија со два брзи гола и во последните пет минути влегоа со предност од 22:25. Талевски погоди за 23:25, а Словенија одговори преку Зарабец. Кодрин со голот во 58 минута (24:27) ја завери победата на Словенија, а до крајот Македонија успеа само да намали на 25:27, резултат кој се покажа како конечен.

Одлична партија одигра Цветан Кузмановски кој беше најпрецизен со осум постигнати голови, Филип Кузмановски даде пет гола, Талески даде четири, Велковски три гола, додека на голот, Мартин Томовски имаше 14 одбрани.
Кај Словенија, Доленец постигна пет гола, а Јанц и Благотиншек дадоа по четири гола.
Следниот натпревар, Македонија ќе го игра за два дена против Црна Гора.