Како што информираат од Ракометната федерација на Македонија (РФМ), по направените дополнителни медициски прегледи во Очната Клиника во Љубљана и добиените резултати констатирано е дека Велко Маркоски ќе треба да отсуствува 14 дена.

Еден од нашите најдобри играчи во одбранбениот дел на пријателскиот натпревар против Словенија доби повреда на левото око, по ударот со топка од страна на противничкиот ракометар Бомбач.

Велко Маркоски в недела навечер ќе се врати во нашата земја каде што во понеделник ќе има дополнителни прегледи и ќе продолжи со рехабилитација.

Ова значи дека нашата најдобра селекција ќе биде ослабена во дефанзивата на претстојното Европско првенство кое за нас почнува на 10. јануари.

Потсетување во прелиминарната групна фаза во Виена ќе играме против домаќинот Австрија, Чешка и Украина.

До првиот меч против Украинците на 10. јануари, „црвено-жолтите“ предводени од селекторот Данило Брестовац ќе имаат уште еден последен тест пред заминувањето за австрискиот главен град против репрезентацијата на Црна Гора в недела.