Кошаркарите на Маџари стигнаа до важна победа во 21. коло од домашното првенство, откако го совладаа Феникс со 82-72 и на тој начин си обезбедија место во плеј-офот.

Иако формално беа во улога на гости, натпреварот се одигра во салата во Маџари, што очигледно им одеше во прилог во остварувањето на триумфот.

Феникс подобро го отвори мечот и првата четвртина ја доби со 23-18, но тоа беше речиси сè што понудија. Маџари постепено го презеде ритамот, а со одлична игра во втората четвртина (21-11) направи пресврт и на полувреме замина со предност од 39-34.

Во вториот дел, Маџари одигра сигурно и контролирано, не дозволувајќи му на противникот да се врати во игра и да се закани со пресврт.

Кај Феникс, Рахама беше најефикасен со 21 поен, додека кај победничкиот тим се истакнаа Хот, Димчевски и Армстронг со по 16 поени. За Маџари ова беше 11-та победа во сезоната, додека Феникс го запиша својот 13-ти пораз.