Фудбалскиот клуб Пелистер претстави уште две нови засилувања за втората полусезона од Првата македонска лига.

Среден ред на битолската екипа ќе биде посилен за Лука Милојевиќ, српски фудбалер за врска, кој доаѓа на позајмица од Раднички Крагујевац.

Се работи за 22-годишен фудбалер, кој во првиот дел на сезоната одигра 17 натпревари на позајмица во Вршац. Се работи за енергичен и поливалентен фудбалер, за кој клубот смета дека ќе биде од голема помош за остварување на целите оваа сезона. Милојевиќ веќе е во Битола и ќе им се придружи на своите нови соиграчи во тренажниот процес.

Дресот на Пелистер ќе го носи и Томче Гроздановски кој се враќа во домашниот шампионат по интернационално искуство. Тој се обврза на договор до крајот на сезоната и официјално беше претставен на стадионот „Петар Милошевски“ во Битола.

Овој 25-годишен играч во есенскиот дел сезонава настапуваше за Конкордија. Претходно во нашата земја, Гроздановски настапуваше за Силекс, Работнички, Металург и Кожуф, додека во странство беше дел од словачкиот Вион и хрватскиот Дугопоље. Од клубот очекуваат да биде од витално значење за средниот ред. Тој веќе ги мина медицинските прегледи и брзо ќе му се стави на располагање на тренерот Милан Стојановски и стручниот штаб.