Македонските одбојкарски репрезентативци Александар Љафтов и Владо Милев се активни во завршницата на унгарската Екстралига, каде го комплетираа полуфиналето на плејофот.

Љафтов и неговиот Елоре обезбедија пласман во финалето, откако полуфиналната серија ја затворија со три победи (3:1, 3:0 и 3:1) над Престиж. Нашиот интернационалец беше константен на трите натпревари и реализираше седум, десет, односно 13 поени.

Во финалната серија, која стартува на 29 април, Елоре ќе се соочи со Капошвар, кој, пак, во полуфиналето во три натпревари ги елиминираше Владо Милев и Казинбарчика.

Милев доби поголема минутажа единствено на последниот натпревар кога реализираше шест поени. Казинбарчика ќе се бори за третото место во унгарското првенство против Престиж, а серијата „подобар во пет“ стартува на 23 април.

Според распоредот на завршницата во Унгарија, јасно е дека Љафтов, а најверојатно и Милев ќе ја пропуштат првата репрезентативна прозивка во Крушево на почетокот на мај.