Интересна ситуација се случува во репрезентацијата на Италија. Играчот на Ливерпул, Федерико Кјеза, повторно го одби повикот на селекторот Џенаро Гатузо и нема да настапи на новемвриските квалификациски натпревари за Светското првенство против Молдавија и Норвешка.

Гатузо истакна дека ова не е првпат Киеза да го пропушти репрезентативното собирање.

„Ова е веќе четврти или петти пат да ја објаснувам ситуацијата. Често разговараме и имам почит кон одлуките и проблемите со кои се соочува секој од нас. Морам да го почитувам она што играчот ќе ми го каже“, изјави селекторот.

Киеза оваа сезона добива сè поголема минутажа во Ливерпул и беше прогласен за играч на месец септември од навивачите. Сепак, тој повторно реши да не се приклучи на Аѕурите, за кои последен пат настапи на ЕУРО 2024.