Англискиот шампион Ливерпул беше меѓу најактивните екипи во последниот ден од зимскиот преоден рок, засилувајќи ја одбраната со Бен Дејвис и Озан Кабак, но по полноќ си замина еден играч, а на еден му беше стопиран трансферот.

Тоа што се најавуваше во последните часови од преодниот рок, се реализира во два часот по полноќ. Такуми Минамино ја финализира позајмицата во Саутемптон за кого ќе ја доигра сезоната. Саутемптон сакаше во договорот да вметне и опција за трансфер, но Ливерпул ја одби таа идеја се задоволи само со 500.000 евра за позајмица до крајот на сезоната.
Минамино кој минатиот јануари пристигна во Ливерпул, сезонава не беше во прв план, а по убедливата победа над Кристал Палас, Јапонецот беше седнат на клупата и оттогаш одигра само седум минути.

Интересно е што Саутемптон сакаше да донесе уште еден фудбалер на Ливерпул, Неко Вилијамс, но Јирген Клоп не дозволи негово заминување. Германецот доцна вечерта дозна дека остана до крајот на сезоната без Жоел Матип и поради тоа не сакаше да го испрати Вилијамс на позајмица.