Лесор ги налути во Белград: Сега ќе работам со најдобриот тренер во светот
Матијас Лесор пред неколку дена го официјализираше својот трансфер во редовите на Панатинаикос, а откако се збогуваше со црно-белите сега и го навлече бесот на фановите на белградскиот тим.
Одличниот кошаркар во изјава за официјалниот сајт на Панатинаикос порача дека заминал да игра за најдобриот тренер во Европа. Ова секако не беше добро прифатено во Белград затоа што Лесор најдобрите настапи во неговата кариера ги пружи под водство на Жељко Обрадовиќ.
Поради тоа неговата изјава се смета за „предавство“, иако напомена дека мисли на последните пет години во Евролигата.
„Тренерот Ергин Атман во последните пет години е најдобриот во Европа. Двапати ја освојуваше Евролигата, а да не беше прекинатата сезона со коронавирусот можеа да бидат и три. Навистина е одличен и искусен тренер кој знае како се победува. Со нетрпение чекам да видам како ќе ја направи мојата игра подобра“, изјави Лесор.
Со Панатинаикос, Лесор потпиша договор на две години, а според најавите и грчкиот репрезентативец Папапетру со кој беше соиграч во Партизан ќе му се придружи во Атина.