Кариесот кај кучињата претставува оштетување на забното ткиво предизвикано од бактерии и киселини. Иако се јавува значително поретко отколку кај луѓето, токму таа реткост често доведува до занемарување на првите знаци, кои се клучни за навремена реакција и зачувување на здравјето на забите, пишува „Љубимци“.

Како и кај човекот, кариесот се развива по оброк – остатоците од храна се задржуваат на забите и стануваат подлога за бактерии. Тие создаваат киселини што ја оштетуваат глеѓта, а со напредување на процесот се зафаќаат подлабоките слоеви, како дентинот и пулпата, каде што се наоѓаат нервите и крвните садови. Ова може да предизвика болка и сериозна непријатност.

Кај кучињата, кариесот се јавува ретко, што се должи на нивната исхрана и градбата на забите. Тие внесуваат помалку шеќери, а забите им се пораздалечени и поинаку обликувани, па храната потешко се задржува. Сепак, кога ќе се појави, најчесто ги зафаќа задните заби, особено нивните природни вдлабнатини, каде што се создаваат идеални услови за развој на бактерии. Еден од првите видливи знаци е темна точка или промена на бојата на забот.

Во почетната фаза симптомите често се незабележливи, но со напредување на оштетувањето се јавуваат поинтензивно лачење плунка, отежнато џвакање, испуштање храна од устата или намален апетит. Кучето може да избегнува тврда храна или да покажува непријатност при јадење – јасни сигнали дека е потребно внимание.

Најчеста причина за појава на кариес е комбинација од несоодветна исхрана и недоволна орална хигиена. Ризикот е поголем кај кучиња што консумираат мека и влажна храна која подолго се задржува на забите, како остатоци од трпеза, оброци богати со скроб, слатки грицки или лепливи посластици.

Иако кариесот кај кучињата најчесто не е итна состојба, тоа не значи дека треба да се игнорира. Ако не се третира навреме, може да доведе до сериозни оштетувања и потреба од покомплексни ветеринарни интервенции, вклучително и вадење заб.

Дијагнозата се поставува при преглед кај ветеринар, каде што промените може да се забележат визуелно, а по потреба се прави и подетален стоматолошки преглед. Третманот зависи од степенот на оштетување – во полесни случаи се отстранува зафатениот дел и се зачувува функцијата на забот, додека во потешки случаи може да биде неопходно вадење.

Редовната орална хигиена, соодветната исхрана и повремените ветеринарни контроли значително го намалуваат ризикот од појава на кариес. Со навремена грижа, може да се спречат компликации и да се обезбеди кучињата да имаат здрави заби и квалитетен живот без болка.

Ново истражување: Когнитивната функција на мозокот страда поради лоша орална хигиена