Е. Пелистер го претстави третото засилување за сезоната 2021/22, нов член на битолскиот суперлигаш е кубанскиот репрезентативец Реиние Табоада Дранкет, кој доаѓа од францускиот клуб Данкерк.

Табоада се обврза на договор на една сезона со опција за уште една и по завршувањето на сезоната во Франција се очекува негово доаѓање во Битола и официјална презентација.

23-годишниот Табоада роден е на 2 јуни 1997 година, висок е 192 сантиметри и тежок 89 килограми и може подеднакво добро да игра како среден и како лев бек. Неговите настапи не останаа незабележани од пошироката јавност, бидејќи беше прогласен за најдобар млад ракометар во Португалија, а во последните две сезони е номиниран за најдобар млад ракометар во францускиот шампионат.

Сезонава во француското првенство одигра 24 натпревари и постигна 68 гола (2,83 гола по натпревар), а во целата своја кариера во Франција бележи 66 натпревари и 164 гола (2,48 гола по натпревар). Токму вчера реализираше пет гола во победата на Данкерк над Трембле со 28-23. Пред да дојде во Франција, Табоада настапуваше во португалската екипа Аванка, каде постигна 239 гола на 69 натпревари.

Важи за еден од најдобрите кубански ракометари, има голем простор за напредок и во Битола доаѓа како важен елемент во тимот на Жељко Бабиќ за наредната сезона. Пред овој потпис, на Е. Пелистер за следната сезона му пристапија уште Марко Кизиќ и Немања Обрадовиќ.

Фото: facebook.com/DunkerqueHandball

 

View this post on Instagram

 

A post shared by RK Eurofarm Pelister (@rkeurofarmpelister)