Крстевски: Се надевам дека ќе ги минеме претквалификациите
Кошаркарската репрезентација на Македонија ги започна подготовките пред стартот на претквалификациите за ЕП 2025 каде ја очекуѕваат дуели со Данска, Словачка и Норвешка.
Кошаркарите првата фаза од подготовките ќе ја одработат во Маврово, а се очекува еден од лидерите да биде Бојан Крстевски.
– Пред се, имаме некои дваесетина дена, од кои седум во Маврово, добро да се подготвиме и да влеземе во натпреварувачки ритам. Екипата сега е малку повеќе комплетна во однос на претходно, имаме и нов селектор со кого добро се познаваме. Имаме еден контролен меч со Црна Гора, кој ќе биде најава за двата претквалификациски дуели- вели Крстевски.
Кошаркарите месецов ќе одиграат два натпревари во претквалификациите, а првиот е закажан за 25 август во Нествед каде избраниците на селекторот Александар Јончевски ќе играат против Данска.
– Се надевам дека ќе ги минеме овие претквалификации. Словачка ни е добро позната, во неколку наврати имаме играно и имаме позитивен скор, се надевам дека така и ќе продолжи. Данска и Норвешка можеби не звучат атрактивно, но не може да се потценат, затоа што денес сите играат кошарка. Одиме чекор по чекор и се надевам на позитивен исход. Секој играч ни е добредојден напомош за овие предизвици- смета Крстевски.