Oфицијална Москва дополнително ги засили обвинувањата дека Украина користела беспилотни летала за напад врз една од официјалните резиденции на Владимир Путин, објави Ројтерс.

Портпаролот на Кремљ, Дмитриј Песков, изјави во Москва дека станува збор за „терористички напад“ со цел нарушување на мировните преговори, тврдејќи дека нападот не бил насочен само против рускиот претседател, туку и против американскиот претседател Доналд Трамп.

Не гледам потреба од дополнителни докази

„Целта беше да се поткопаат напорите на претседателот Трамп да посредува во мирно решавање на украинскиот конфликт, кој е исклучително сложен“, рече Песков.

Тој додаде дека, според него, не гледа потреба од дополнителни докази.

„Не мислам дека треба да има никакви докази тука ако имало масовен напад со беспилотно летало, кој бил успешно соборен од нашиот систем за воздушна одбрана. Што се однесува до остатоците, тоа е прашање на војската“, рече тој.

Украинските негирања се апсурдни

Песков одби да каже каде бил Путин во времето на наводниот напад, наведувајќи дека тоа е „тема што не е предмет на јавна дискусија“.

Тој ги нарече негирањата на Украина „апсурдни“.

„Гледаме дека Зеленски се обидува да го негира ова, а многу западни медиуми, играјќи во корист на режимот во Киев, почнуваат да го шират наративот дека ова не се случило. Ова се апсурдни тврдења“, рече Песков.

Тој исто така нагласи дека Русија, и покрај наводниот напад, не се откажува од разговорите за мировен план.

„Русија ќе го продолжи процесот на преговори и дијалогот, првенствено со Американците“, рече тој, предупредувајќи дека овој настан ќе доведе до „заострување“ на преговарачката позиција на Русија.

„Што се однесува до воените последици, нашата војска знае како, со што и кога да одговори“, заклучи тој.

Лавров вели дека Украинците со 91 дрон ја нападнале резиденцијата на Путин: Лага е, тврди Зеленски