Кошаркарките „газат“ во Тбилиси, рекордна победа против Ерменија
Женската кадетска репрезентација на Македонија продолува со одличните настапи и победи на ФИБА „Челенџер“ турнирот во Тбилиси.
По ден предвиден за одмор, нашите млади кошаркарки го остварија и третиот триумф на турнирот совладувајќи ја Ерменија со дури 70 поени разлика, односно 92:22.
Тоа е и рекордната победа на една наша младинска репрезентација во европските натпреварувања. И трет триумф по ред за избраничките на селекторот Никола Златев на „балонот“ во главниот град на Грузија.
А токму селекцијата на Грузија ќе биде нашиот следeн противник во натпреварот кој е закажан за сабота, од 17.00 часот.
На дуелот со нерамноправниот противник, уште во првата четвртина стекнавме висока предност (17:2), што беше јасен показател за квалитетите на двете селекции. Најубедливи, нашите кадетки беа во третата чевртина која ја реализираа во своја корист со (32:4).
Од стрелците најефикасна беше М. Алексовска со 25 поени (по пет скокови и украдени топки), по 12 поени А. Тодорова (пет скокови, седум украдени топки) и Б. Стоевска (шест украдени топки).
На табелата води Албанија со седум бодови, но веќе ги заврши настапите во групата, следува Македонија со шест максимални бодови, по четири имаат Малта и Ерменија, а три последнопласираната Грузија.
Па така, за очекување македонските кошаркарски надежи да ја оправдаат фаворитската улога и против Грузијките и да го освојат првото место.