Словенечкиот дел на Јадранот, а особено Копар, традиционално привлекува посетители низ целата година. Иако градот е популарна летна дестинација, неговите убавини можат да се уживаат и во студените месеци, пишува „Б92“.

Љубителите на планинарење, пешачење и велосипедски тури ќе најдат многу можности за активности на свеж воздух. Без разлика дали се во одлична физичка форма или само сакаат да се релаксираат во природа, посетителите на Крашиот рид ќе уживаат во бројните патеки прилагодени на различни нивоа на подготовка. Медитеранската клима и фасцинантните пејзажи го прават секој излет незаборавен.

Копарската катедрала

Градот нуди многу знаменитости, а централниот плоштад, кој го носи името на Јосип Броз Тито, често се користи како почетна точка за разгледување.

Во непосредна близина се наоѓа Копарската катедрала, препознатлива по 54-метарската кула. Особено интересен е фактот дека градското ѕвоно е најстарото во Словенија кое сѐ уште функционира. Изработено е уште во 14. век во Венеција и го носи името на Свети Назар, за кого се верува дека го штити Копар.

На висина од 43 метри се наоѓа и видиковец до кој водат 204 скалила, од каде се открива спектакуларен поглед на градот и заливот.

Музеј со уникатна историја

Животот на многумина во времето на поранешна Југославија го обележа моторот „Томос“. Денес, љубителите на овој мотор можат да се потсетат на минатите времиња во Музејот на историјата на Томос, сместен во старото градско јадро.

Покрај богата колекција на мотори, посетителите можат да се запознаат и со историјата на истоимената фабрика, која го оставила својот белег врз индустрискиот развој на регионот.