Инспекциските служби на Општина Центар започнаа со  теренски контроли за да утврдат дали терасите, натстрешниците, шанковите, перголите, параваните, застаклените конструкции и другата урбана опрема пред угостителските објекти се поставени со важечко одобрение и согласно издадената документација.

Поради тоа, Општина Центар ги повикува сите правни субјекти и сопственици на угостителски објекти навремено да ја проверат и подготват целокупната документација за поставената урбана опрема на јавните површини.

За секоја утврдена неправилност, како што велат оттаму, инспекторите согласно законските надлежности, ќе поведат прекршочни постапки и ќе изрекуваат санкции.

Градоначалникот на Општина Центар Горан Герасимовски порачува дека нема да има толеранција за бесправно узурпирање на јавниот простор.

„Нашите инспекциски служби се на терен. Соодветни казни ќе има за сите што немаат одобрение за поставување урбана опрема“, рече Герасимовски.