На листата на 100 најбогати луѓе во регионот, која ја состави „Недељник“, првите две места ги заземаат граѓани на Србија, додека третото место го зазема бизнисмен од Хрватска. На листата на 100 најбогати има и четворица Црногорци, како и две лица кои не се од светот на бизнисот.

На листата на „Недељник“ се наоѓаат вкупно 20 милијардери, предводени од сопственикот на „Делта Холдинг“ Мирослав Мишковиќ, чие богатство се проценува на 3.011.403.812 евра. Второто место го зазеде семејството Костиќ, сопственик на „МК Груп“, со богатство од 2.918.891.445 евра, додека на третото место се најде Хрватот Силвио Кутиќ („Инфобип“) со богатство проценето на 2.524.942.253 евра.

Меѓу српските милијардери, се издвојуваат сопствениците на „Моцарт“, Дејан Чакајац и Јадранка Степановиќ, со богатство од нешто повеќе од две милијарди евра. На петтото место на листата е Петар Матијевиќ, сопственикот на „Матијевиќ“, чие богатство се проценува на 1.794.545.863 евра. Филип Чептер е рангиран на 12-то место меѓу најбогатите луѓе во регионот, со богатство проценето на помалку од 1,5 милијарди евра. По него, на 13-то место се сопствениците на „Спортвижн“, Борислав и Драган Станојловиќ, чие богатство вреди околу 1,367 милијарди евра.

Повеќе од една милијарда евра во Србија имаат и Љубиша Крстајиќ, сопственик на групацијата „Каризма“, сопствениците на НЕЛТ Небојша Шапоњиќ и Ранко Сочанац, Драган Шолак, Богољуб Кариќ и Небојша Шарановиќ, сопственик на КАППА Стар. На листата на најбогати во регионот се и бизнисмени блиски до власта, за кои „Форбс Србија“ пишуваше како за нова српска бизнис-елита. Тука се сопствениците на „Милениум тимот“ Иван Бошњак и Стојан Вујко, Драгољуб Збиљиќ, сопственик на „Енерготехника“ Јужна Бачка, Давор Мацура, сопственик на „Алта груп“ и Мирољуб Алексиќ, кој иако важи за финансиер на СНС, останува под радарот на пошироката јавност.

Сопственикот на „Пинк“, Жељко Митровиќ е 52-ри на листата, со богатство проценето на 591,7 милиони евра.

Меѓу бизнисмените на листата има и спортисти. Тенисерот Новак Ѓоковиќ го зазеде 65-то место со проценети 455 милиони евра. Кошаркарот Никола Јокиќ е на 74-то место со 385 милиони евра. Според оваа листа, најбогат Хрват е Силвио Кутиќ, сопственик на „Инфобип“, со богатство од 2.524.942.253 евра. По него следува Мате Римац со речиси една милијарда евра помалку.

Четворица Црногорци беа меѓу најбогатите луѓе во регионот. Најбогатиот човек во Црна Гора е Иван Убовиќ, сопственик на „Бемакс“, кој има близу 431 милион евра. Веднаш зад него е сопственикот на „Волија“ Драган Бокан, чие богатство се проценува на 421 милион. Тука се и Комнен Лаковиќ, сопственик на „Хард Дискант Лаковиќ“ и сопственикот на „КИПС“ Ристо Дрекаловиќ. Најбогатиот човек во Босна и Херцеговина е Сенад Џамбиќ, со богатство од малку повеќе од една милијарда евра. Џамбиќ е сопственик на „Бинго групација“ и со своето богатство го зазеде 21-то место.

Најбогатиот човек во Северна Македонија е Живко Мукеатов, чие богатство од 892 милиони евра се темели на сопственоста на познатата фармацевтска компанија „Алкалоид“.

Листата на 100-те најбогати луѓе во регионот ја составија експерти од две реномирани консултантски фирми кои работат на Њујоршката берза. Тие користеа авторитативни мултипликатори од Школата за бизнис „Стерн“, Универзитетот во Њујорк (и споредбени компании) и во анализата ги вклучија резултатите од пазарните трансакции во регионот и светот, објави Н1.