Поранешниот претседател Бил Клинтон и поранешната државна секретарка Хилари Клинтон изјавија дека ќе одбијат да постапат по конгресна покана со која се бара од нив да сведочат во истрагата поврзана со Џефри Епстин, објави „Асосиејтед прес“.

Клинтонови ги оценуваат обидите на комитетот под контрола на Републиканците како „правно невалидни“, додека пратениците од Републиканската партија се подготвуваат да покренат постапка за непочитување на Конгресот против нив.

Во писмо објавено во вторникот на социјалните мрежи, Клинтонови му порачуваат на претседателот на Комитетот за надзор на Претставничкиот дом, републиканскиот конгресмен Џејмс Комер, дека тој е на работ да започне процес „буквално осмислен да резултира со наше затворање“.

Комер изјави дека следната недела ќе започне постапка за непочитување на Конгресот, со што потенцијално се отвора сложен и политички чувствителен процес, по кој Конгресот ретко посегнувал.

– Никој не ги обвинува Клинтонови за какво било кривично дело. Ние само имаме прашања. Секој би признал дека поминале многу време заедно – изјави Комер пред новинарите, откако Бил Клинтон не се појави на закажаното сведочење во канцелариите на Претставничкиот дом во вторникот.

ГАЛЕРИЈА: Досега непозната и морничава приказна за Џефри Епстин, раскажана од фотограф

Клинтон никогаш не бил обвинет за какво било незаконско дело поврзано со Епстин, но имал добро документирано пријателство со него — богат финансиер — во текот на 1990-те и раните 2000-ти години. Републиканците го ставаат токму тој однос во фокусот додека се обидуваат да ја преземат контролата врз барањата за целосно расчистување на злосторствата на Епстин.

Епстин беше уапсен во 2019 година под федерални обвиненија за сексуална трговија со луѓе и заговор. Тој се самоуби во затворска ќелија во Њујорк додека го чекаше судењето.

Повеќе поранешни претседатели доброволно сведочеле пред Конгресот, но ниеден досега не бил присилен на тоа.

Комер, исто така, посочи дека комитетот нема да се обиде да изнуди сведочење од претседателот Доналд Трамп, негов сопартиец, наведувајќи дека Конгресот не може да го присили актуелен претседател да сведочи.

Објавени се многу нови документи за Џефри Епстин – што ќе откријат за злогласниот сексуален предатор?