Министерот за животна средина и просторно планирање Муамет Хоџа ќе организира јавна расправа за постапката за обновување на дозволата за УСЈЕ на која, како што најавуваат од ресорното Министерство, ќе присуствуваат сите засегнати страни како и претставници на граѓанските организации и иницијативи.

„Министерот за животна средина и просторно планирање, Муамет Хоџа го почитува и поддржува секој мирен протест како демократско право на граѓаните и останува посветен на јакнење на транспарентноста и отвореноста на институцијата. Во таа насока, како што веќе беше најавено пред медиумите, Министерството ќе организира јавна расправа за постапката за обновување на дозволата за УСЈЕ, за што веќе е поднесено барање. На расправата ќе бидат поканети сите засегнати страни, вклучително и претставници на граѓанските организации, иницијативи и стручната јавност. Сметаме дека суштинскиот придонес се остварува преку отворен и аргументиран дијалог во институционални рамки“, се вели во соопштението од Министерството за животна средина.

Граѓанскиот сектор, велат оттаму, е важен партнер во напорите за заштита на животната средина, а преку транспарентни процеси може да се изгради доверба во институциите и да се обезбедат одржливи решенија во интерес на граѓаните.

Активисти на иницијативата „Стоп за УСЈЕ“ денеска спроведоа герила-акција пред МЖСПП, со која испратија порака дека внимателно го следат процесот на издавање на дозволата.

ФОТО+ВИДЕО | Макета на Усје „чуреше“ пред Министерството за животна средина, додека активисти расправаа за поголема контрола над Цементарницата

Во меѓувреме, компанијата „Титан Усје“ соопшти дека продолжувањето на дозволата се одвива според законот и во соработка со институциите.

„При подготовката на апликацијата за продолжување на дозволата, компанијата во целост ги следи обврските и условите што произлегуваат од законските и подзаконските акти и соработува со сите надлежните институции. Грижата за животната средина е основна вредност за ТИТАН Усје. Свесни сме дека заштитата на животната средина и квалитетот на воздухот предизвикуваат загриженост кај граѓаните и во нашето општество, како целина. ТИТАН Усје внимателно ја следи јавната дебата, сериозно ги сфаќа овие проблеми и дава транспарентен придонес кон нивно решавање“, велат од компанијата.

ВИДЕО+ГАЛЕРИЈА | „Профит за Усје, болест за народот“: Граѓанска блокада на Цементарница