Вечерва, пред влезот на Цементарница „Усје“, се одржа блокадата организирана од иницијативата „Стоп за Усје“, со која граѓаните го изразија револтот од енормното загадување на воздухот, во кое, според нив, значително учествува скопската фабрика за цемент.

На граѓанскиот протест дојдоа луѓе од сите возрасти – млади, семејства со деца, повозрасни жители од околните населби – сите со заедничка порака дека воздухот во градот „не може и не смее да остане нерешен проблем“.

Атмосферата беше мирна. Немаше инциденти, ниту тензии, но присутната тишина меѓу скандирањата и аплаузите зборуваше доволно за акумулираното незадоволство. Многумина од учесниците на протестот носеа транспаренти, а на централниот пишуваше: „Профит за Усје, болест за народот“.

На протестот се обратија повеќе активисти, а на Цементарница симболично, како и во 2019 година на сличен протест, ѝ го доделија „признанието“ за „Трујач на годината“.

На блокадата се зборувше за секојдневието во загадениот град – за зимските месеци со смог, за здравствените последици и за чувството дека проблемот со години само се одложува и не се решава.

Дел од граѓаните кои протестираа истакнаа дека оваа блокада „не е насочена само кон една фабрика“, туку кон решавањето на поголемиот проблем со загадениот воздух во главниот град.