Кинезите не заобиколуваат затоа што им треба виза
Се зголемува бројот на домашни и странски туристи, но се уште има многу неискористени можности за да се заработат што повеќе пари од туристите. Треба да се работи на развој на алтернативиотн туризам, но има и бариери, како на пример виза за туристите од Кина.
Ова беше кажано на трибината „Стратешки развој на туризмот и угостителството за поголеми економски ефекти“, што се одржа во Стопанската комора.
– Бројките се добри и за минатата и за оваа година, а тоа значи имаме зголемување и на ноќевањата, и на странските и на домашните туристи за 4,8 проценти. Она што го очекуваме е зголемување на процентот во БДП-то, кој лани беше 1,7 посто, а сега очекуваме 2 – 2,5 проценти. Нашата цел е до 2023 година да го подигнеме 5 проценти. Затоа продолжува владината поддршка која во 2020 ќе изнесува 36 милиони денари – рече државниот советник во Министерството за економија, Зоран Павловски.
Директорот на Агенцијата за промоција на туризмот, Љупчо Јаневски рече дека идната година ќе бидат фокусирани на комуницирање со слободните патувачи и на промоцијата на винскиот туризам.
– Дополнително ќе ги означиме и 10-те најкачувани врвови во државата– потенцираше Поповски.
Тој потсети дека почнува онлајн промоцијата на македонските туристички потенцијали низ балканските земји, а стартот е од Словенија и Бугарија.
– Ќе бидеме 100 отсто онлајн присутни на најпосетените портали, а комуницираме и со блогери. Во 2020 година очекуваме да не посетат повеќе слободни патувачи. Нашата земја е можеби последната неоткриена дестинација во Европа – истакна Јаневски.
Елена Младеновска, директорка на Здружението „Вина од Македонија” дополни дека компетитивна предност на земјава се винскиот и гастро-туризмот и дека при промоцијата фокусот треба да се стави тука, но притоа е неопходно да се создадат и услови од страна на државата.
– Кинеските туристи се присутни во регионот, но земјава ја заобиколуваат зашто за влез им треба виза- посочи Младеновска.
Прогнозата е дека наредната година земјава да ја посетат над 1,3 милиони туристи и ќе се приближиме до бројката од четири милиони ноќевања што укажува дека девизниот прилив треба да биде над 400 милиони долари.