За време на летните денови, многумина се свртуваат кон природни начини за заштита од комарци, а меѓу најчестите препораки се лавандата, босилекот, нането и рузмаринот. Но, иако овие растенија содржат состојки што можат да ги одбиваат инсектите, експертите предупредуваат дека само нивното присуство во дворот или на терасата нема да создаде заштитна бариера.

Според научници од Универзитетот на Флорида, заблудата е во очекувањето дека растенијата сами по себе ќе ги држат комарците настрана.

„Одредени растенија содржат соединенија што ги одбиваат комарците. Но, доколку не се извлечат нивните етерични масла и не се нанесат како спреј, нивното дејство е многу ограничено. Концентрацијата на испарливите соединенија околу растението е премногу мала за да создаде ефикасна заштитна зона“, објаснува експертката Лија Континентино.

Тајната е во етеричните масла

Растенијата произведуваат природни соединенија како линалол, цитронелал и непеталактон, кои служат како нивен одбранбен механизам против инсекти.

Овие материи можат да го прикријат човечкиот мирис или да ги збунат сетилата на комарците, но за да се ослободат во поголема количина, потребно е листовите да се истријат или згмечат. Со тоа се оштетуваат растителните клетки и се ослободуваат етеричните масла, кои имаат најсилно репелентно дејство.

Кои растенија се најдобар избор?

Меѓу најефикасните природни сојузници против комарците се мачкината трева, лавандата, рузмаринот, кадификата и босилекот.

Особено се издвојува мачкината трева, чија активна состојка – непеталактон – според некои истражувања покажала и до десетпати посилно репелентно дејство од ДЕЕТ, состојката што најчесто се користи во комерцијалните средства против инсекти.

Лавандата, благодарение на линалолот, го нарушува сетилото за мирис кај комарците, додека рузмаринот и кадифицата ги одбиваат не само комарците, туку и мувите и молците.

Експертите препорачуваат овие растенија да се садат во близина на врати, прозорци и патеки, каде што почесто ќе се допираат и ќе го ослободуваат својот мирис.

Најважно е да нема застоена вода

Сепак, најдобрата заштита од комарците не се сведува само на миризливи растенија.

Џенифер Пелам од Универзитетот на Флорида предупредува дека дури и многу мала количина застоена вода може да стане место за размножување на комарците.

Затоа, редовното празнење на подлошките под саксиите, поилките за птици, старите гуми и сите садови во кои се задржува вода е најважната превентивна мерка.

Дополнително, создавањето двор што привлекува природни непријатели на комарците, како птици и вилински коњчиња, може значително да помогне во намалувањето на нивниот број и да придонесе за поздрав и порамнотежен екосистем.

Го чешате убодот од комарец? Експертите открија што се случува под кожата и зошто правите опасна грешка